-నేరడ–గాదిరెడ్డిపల్లె అనుసంధాన వంతెన కోసం ఉధృతమవుతున్న ఉద్యమం
-బ్రిడ్జి స్థలంలో మహిళలతో కలిసి భారీ ధర్నా నిర్వహించిన గ్రామస్తులు
-100 మందికి పైగా రైతులతో కలెక్టరేట్కు కాసోజు శంకరాచారి నేతృత్వంలో ర్యాలీ
-దశాబ్దాలుగా కొనసాగుతున్న రాకపోకల సమస్యకు శాశ్వత పరిష్కారం కోరిన ప్రజలు
-రైతులు, విద్యార్థులు, గర్భిణీలు, వృద్ధుల ఇబ్బందులను వివరించిన నాయకులు
-సమస్యను ప్రాధాన్యంగా తీసుకుని అధికారులకు ఆదేశాలు జారీ చేసిన కలెక్టర్
-వెంటనే వంతెన నిర్మాణ పనులు ప్రారంభించాలని ప్రభుత్వానికి ప్రజల డిమాండ్
నేరడ/నల్లగొండ, జూన్ 15 (స్పెషల్ ఎడిషన్):
నేరడ–గాదిరెడ్డిపల్లె గ్రామాల మధ్య అనుసంధాన వంతెన నిర్మాణం కోసం ప్రజల పోరాటం మరింత ఉధృతమవుతోంది. దశాబ్దాలుగా కొనసాగుతున్న ఈ సమస్యకు శాశ్వత పరిష్కారం చూపాలని కోరుతూ ఒకవైపు బ్రిడ్జి నిర్మాణ ప్రతిపాదిత స్థలంలో మహిళలు, గ్రామస్తులు భారీ ధర్నా నిర్వహించగా, మరోవైపు వంద మందికి పైగా రైతులు నల్లగొండ జిల్లా కలెక్టరేట్కు ర్యాలీగా వెళ్లి తమ గోడును అధికారుల దృష్టికి తీసుకెళ్లారు. ఈ రెండు కార్యక్రమాలకు కాసోజు శంకరాచారి నాయకత్వం వహించారు. సోమవారం నేరడ–గాదిరెడ్డిపల్లె మధ్య ప్రతిపాదిత బ్రిడ్జి స్థలంలో నిర్వహించిన ధర్నాలో పెద్ద సంఖ్యలో మహిళలు, రైతులు, యువకులు పాల్గొన్నారు. “బ్రిడ్జి మా హక్కు – వెంటనే నిర్మించాలి”, “ప్రజల కష్టాలకు శాశ్వత పరిష్కారం చూపాలి” అంటూ నినాదాలు చేస్తూ తమ నిరసన వ్యక్తం చేశారు. ఈ సందర్భంగా కాసోజు శంకరాచారి మాట్లాడుతూ, బ్రిడ్జి లేకపోవడం వల్ల రెండు గ్రామాల ప్రజలు ఏళ్ల తరబడి అనేక ఇబ్బందులు ఎదుర్కొంటున్నారని తెలిపారు. ముఖ్యంగా వర్షాకాలంలో గ్రామాల మధ్య రాకపోకలు పూర్తిగా స్తంభించి ప్రజలు తీవ్ర ఇబ్బందులు పడుతున్నారని ఆవేదన వ్యక్తం చేశారు.
వ్యవసాయమే ప్రధాన జీవనాధారంగా ఉన్న ఈ ప్రాంతంలో రైతులు తమ పొలాలకు చేరుకోవడానికి, పండించిన పంటలను మార్కెట్కు తరలించడానికి ఎన్నో కష్టాలు పడుతున్నారని పేర్కొన్నారు. రవాణా సౌకర్యం లేక రైతుల శ్రమ వృథా అవుతుండగా, ఆర్థిక నష్టాలు కూడా ఎదురవుతున్నాయని చెప్పారు. విద్యార్థులు పాఠశాలలు, కళాశాలలకు వెళ్లేందుకు తీవ్ర ఇబ్బందులు పడుతుండగా, అత్యవసర వైద్య సేవలు పొందడంలో ప్రజలు అవస్థలు పడుతున్నారని వివరించారు. అనంతరం నేరడ–గాదిరెడ్డిపల్లె గ్రామాలకు చెందిన రైతులు, మహిళలు, యువకులు కాసోజు శంకరాచారి నేతృత్వంలో నల్లగొండ జిల్లా కలెక్టరేట్కు భారీ ర్యాలీగా వెళ్లి జిల్లా కలెక్టర్కు వినతిపత్రం సమర్పించారు. ప్రజల ప్రాణాలకు సంబంధించిన ఈ సమస్యను ఇకపై నిర్లక్ష్యం చేయవద్దని, వంతెన నిర్మాణానికి తక్షణ చర్యలు తీసుకోవాలని డిమాండ్ చేశారు. కలెక్టరేట్ వద్ద మాట్లాడిన రైతులు, గ్రామస్తులు వర్షాకాలం వస్తే గ్రామాల మధ్య సంబంధాలు పూర్తిగా తెగిపోతున్నాయని తెలిపారు. గర్భిణీలు, వృద్ధులు, అనారోగ్యంతో బాధపడుతున్న రోగులను ఆసుపత్రులకు తరలించేందుకు ప్రత్యామ్నాయ మార్గాల కోసం గంటల తరబడి ప్రయాణించాల్సి వస్తోందని ఆవేదన వ్యక్తం చేశారు. కొన్నిసార్లు ప్రాణాపాయ పరిస్థితులు కూడా ఎదురవుతున్నాయని పేర్కొన్నారు. విద్యార్థులు విద్యకు దూరమవుతుండగా, రైతులు వ్యవసాయ కార్యకలాపాలు నిర్వహించడంలో ఇబ్బందులు ఎదుర్కొంటున్నారని తెలిపారు. ఈ సందర్భంగా కాసోజు శంకరాచారి మాట్లాడుతూ, నేరడ–గాదిరెడ్డిపల్లె అనుసంధాన వంతెన నిర్మాణం కేవలం అభివృద్ధి పనికాదని, వేలాది మంది ప్రజల జీవనాడిని కలిపే అత్యవసర ప్రాజెక్ట్ అని పేర్కొన్నారు. ఈ వంతెన నిర్మాణం పూర్తయితే వ్యవసాయం, విద్య, వైద్యం, రవాణా, వ్యాపార రంగాల్లో గణనీయమైన మార్పులు చోటుచేసుకుంటాయని వివరించారు. గత కొన్నేళ్లుగా ప్రజలు ఎదురుచూస్తున్న ఈ డిమాండ్ను ప్రభుత్వం వెంటనే నెరవేర్చాలని కోరారు. రైతులు, గ్రామస్తుల విన్నపాలను శ్రద్ధగా విన్న జిల్లా కలెక్టర్ సమస్యను అత్యంత ప్రాధాన్యంగా పరిగణిస్తూ సంబంధిత శాఖల అధికారులకు తక్షణ ఆదేశాలు జారీ చేసినట్లు సమాచారం. ఆర్ అండ్ బి శాఖ సూపరింటెండింగ్ ఇంజనీర్తో పాటు ఇతర అధికారులను బ్రిడ్జి పనుల పరిశీలన నిర్వహించి నివేదిక సమర్పించాలని ఆదేశించినట్లు కాసోజు శంకరాచారి తెలిపారు. సమస్య పరిష్కారానికి అవసరమైన చర్యలు త్వరలోనే ప్రారంభమవుతాయని కలెక్టర్ భరోసా ఇచ్చినట్లు చెప్పారు. కలెక్టర్ స్పందనపై గ్రామ ప్రజలు హర్షం వ్యక్తం చేస్తూ, దశాబ్దాలుగా కొనసాగుతున్న తమ పోరాటానికి త్వరలో ఫలితం దక్కుతుందనే ఆశాభావం వ్యక్తం చేశారు. ప్రభుత్వం వెంటనే నిధులు మంజూరు చేసి వంతెన నిర్మాణ పనులను ప్రారంభించాలని డిమాండ్ చేస్తూ, అవసరమైతే ఉద్యమాన్ని మరింత ఉధృతం చేస్తామని హెచ్చరించారు. ఈ కార్యక్రమంలో మర్ల రాజ్యలక్ష్మి, ఆవుల సైదమ్మ, మంద యశోద, ఆవుల యాదమ్మ, ఆవుల కవిత, వల్లపు పద్మ, వల్లపు సుజాత, చిరుగోని సాలమ్మ, తీగల కృష్ణారావు, తీగల వెంకటరావు, రామగిరి వసంతరావు, మర్ల ఉమారెడ్డి, ఆవుల నరసింహ, ఆవుల శ్రీను, వల్లపు శ్రీశైలం, చిరుగోని మల్లేష్, కడారి శంకర్, వల్లపు వెంకన్నలతో పాటు గ్రామ నాయకులు మర్ల రామ్రెడ్డి, గంజి కృష్ణయ్య, సన్యాసిరావు, మంద వేణుగోపాల్రెడ్డి, ప్రిన్స్ రమేష్బాబు, మిరియాల మురళీకృష్ణ, గంజి గోవర్ధన్, వీరమల్ల అరుణ్ కుమార్ తదితరులు పాల్గొన్నారు. నేరడ-గాదిరెడ్డిపల్లె గ్రామాల నుంచి పెద్ద ఎత్తున రైతులు, మహిళలు, యువకులు హాజరై “బ్రిడ్జి మా హక్కు – నిర్మాణం వెంటనే చేపట్టాలి” అంటూ నినాదాలు చేశారు.