నల్లగొండ–ఖమ్మం–వరంగల్ పట్టభద్రుల నియోజకవర్గంపై బీజేపీ దృష్టి
సీనియర్ జర్నలిస్టుగా రెండు దశాబ్దాల అనుభవం
నేరడ సర్పంచ్ అభ్యర్థిగా రాజకీయ ప్రస్థానానికి శ్రీకారం
పట్టభద్రుల మద్దతుతో ఎన్నికల ప్రచారానికి సన్నాహాలు
యువతకు ప్రాధాన్యం ఇస్తే అవకాశం తనదేనంటున్న బీజేపీ శ్రేణులు
స్పెషల్ కరస్పాండెంట్ అక్టోబర్ 5 (స్పెషల్ ఎడిషన్):
నల్లగొండ–ఖమ్మం–వరంగల్ పట్టభద్రుల ఎమ్మెల్సీ ఎన్నికల నేపథ్యంలో భారతీయ జనతా పార్టీ అభ్యర్థిత్వం కోసం పలువురు ఆశావహులు ప్రయత్నాలు కొనసాగిస్తుండగా, సీనియర్ జర్నలిస్టు శంకరాచారి పేరు బలంగా వినిపిస్తోంది. సుమారు రెండు దశాబ్దాలుగా జర్నలిజం రంగంలో కొనసాగుతూ, వివిధ జిల్లాల్లో ప్రజా సమస్యలపై తనదైన శైలిలో స్పందించిన శంకరాచారి అభ్యర్థిత్వంపై బీజేపీ శ్రేణుల్లో చర్చ జరుగుతోంది. పట్టభద్రుల నియోజకవర్గం కావడంతో విద్యావంతులు, యువతతో అనుసంధానం ఉన్న వ్యక్తికి అవకాశం కల్పిస్తే పార్టీకి ప్రయోజనం ఉంటుందనే అభిప్రాయాలు వ్యక్తమవుతున్నాయి. జర్నలిజం రంగంలో అనేక ప్రముఖ దినపత్రికలకు వ్యాసాలు రాస్తూ ప్రజా సమస్యలను వెలుగులోకి తీసుకువచ్చిన శంకరాచారి, ఎలక్ట్రానిక్ మీడియా రంగంలోనూ ప్రజా సమస్యల పరిష్కారం కోసం పలు కార్యక్రమాలు, పోరాటాలు నిర్వహించినట్లు ఆయన అనుచరులు చెబుతున్నారు. రాష్ట్ర రాజకీయాలపై మాత్రమే కాకుండా జాతీయ రాజకీయ పరిణామాలపై కూడా అవగాహన కలిగి ఉండటం ఆయనకు అదనపు బలంగా వారు పేర్కొంటున్నారు.
రాజకీయ ప్రస్థానంలో నేరడ కీలక మలుపు
చిట్యాల మండలం నేరడ గ్రామంలో గతంలో బీజేపీ బలపరిచిన సర్పంచ్ అభ్యర్థిగా శంకరాచారి రాజకీయ రంగంలో తన అనుభవాన్ని చాటుకున్నారని పార్టీ వర్గాలు గుర్తుచేస్తున్నాయి. నేరడ గ్రామంలో బీజేపీ ఓటింగ్ శాతాన్ని అనూహ్యంగా పెంచేందుకు ఆయన చేసిన ప్రయత్నాలు అప్పట్లో చర్చనీయాంశంగా మారాయని చెబుతున్నారు. పరిమిత వనరులతోనూ ప్రజలతో నేరుగా మమేకమై పార్టీ సిద్ధాంతాలను వివరించడం, స్థానిక సమస్యలను ప్రస్తావించడం ద్వారా ఓటర్లను ఆకట్టుకున్నారని ఆయన అభిమానులు పేర్కొంటున్నారు.
యువతకు అవకాశం.. శంకరాచారి పేరు
రానున్న ఎమ్మెల్సీ ఎన్నికల్లో యువతకు ప్రాధాన్యం ఇవ్వాలని బీజేపీ అధిష్ఠానం భావిస్తున్నట్లు పార్టీ వర్గాల్లో చర్చ జరుగుతోంది. ఈ నేపథ్యంలో విద్యావంతులు, యువత, జర్నలిస్టు వర్గాలతో సంబంధాలు ఉన్న శంకరాచారి పేరు ఆశావహుల జాబితాలో ముందువరుసలో ఉందని బీజేపీ శ్రేణులు పేర్కొంటున్నాయి. అయితే పార్టీ అధిష్ఠానం అధికారికంగా అభ్యర్థిని ప్రకటించాల్సి ఉంది.
ప్రచారానికి సిద్ధం
అభ్యర్థిత్వం ఖరారైతే నల్లగొండ, ఖమ్మం, వరంగల్ ఉమ్మడి ప్రాంతాల్లో పట్టభద్రులను కలుస్తూ విస్తృత ప్రచారం నిర్వహించేందుకు శంకరాచారి సిద్ధమవుతున్నట్లు ఆయన సన్నిహిత వర్గాలు చెబుతున్నాయి. ఉద్యోగులు, నిరుద్యోగులు, యువత, విద్యావంతులు ఎదుర్కొంటున్న సమస్యలను ప్రధాన ఎన్నికల అంశాలుగా తీసుకుని ముందుకు వెళ్లాలనే ఆలోచనలో ఉన్నట్లు సమాచారం. ప్రధాని నరేంద్ర మోదీ నేతృత్వంలోని కేంద్ర ప్రభుత్వం చేపడుతున్న అభివృద్ధి కార్యక్రమాలను ప్రజల్లోకి తీసుకెళ్లడంలో శంకరాచారి చురుకుగా వ్యవహరించారని బీజేపీ శ్రేణులు పేర్కొంటున్నాయి. దేశ అభివృద్ధి, యువతకు అవకాశాలు, సాంకేతిక ప్రగతి, జాతీయ భద్రత వంటి అంశాల్లో బీజేపీ విధానాలను ప్రజలకు వివరించడమే తన రాజకీయ లక్ష్యమని శంకరాచారి చెబుతున్నట్లు ఆయన అనుచరులు తెలిపారు.
“ప్రత్యర్థులు ఎవరైనా సిద్ధమే”
ఎమ్మెల్సీ ఎన్నికల్లో పార్టీ అవకాశం కల్పిస్తే ప్రత్యర్థులు ఎవరైనా సమర్థంగా ఎదుర్కొనేందుకు సిద్ధంగా ఉన్నానని శంకరాచారి ధీమా వ్యక్తం చేస్తున్నట్లు తెలుస్తోంది. తనకు జర్నలిజం ద్వారా ప్రజలతో ఏర్పడిన అనుబంధం, రాజకీయాలపై ఉన్న అవగాహన, క్షేత్రస్థాయిలో పనిచేసిన అనుభవం ఎన్నికల్లో తనకు బలంగా మారుతుందని ఆయన విశ్వసిస్తున్నట్లు సమాచారం. దేశాన్ని మరింత ముందుకు తీసుకెళ్లాలంటే బీజేపీతోనే సాధ్యమనే నమ్మకంతో పనిచేస్తున్నానని, పార్టీ తనకు అవకాశం కల్పిస్తే పట్టభద్రుల సమస్యలను శాసనమండలిలో బలంగా వినిపించేందుకు కృషి చేస్తానని శంకరాచారి చెబుతున్నట్లు ఆయన వర్గాలు పేర్కొంటున్నాయి. దేశ నాయకుల అండదండలు తనకు ఉన్నాయని, పార్టీ అధిష్ఠానం నిర్ణయాన్ని గౌరవిస్తూ అభ్యర్థిత్వం కోసం కృషి చేస్తానని ఆయన స్పష్టం చేస్తున్నట్లు సమాచారం. మొత్తంగా రెండు దశాబ్దాల జర్నలిజం అనుభవం, ప్రజా సమస్యలపై పోరాటాలు, గతంలో బీజేపీ తరఫున సర్పంచ్ అభ్యర్థిగా పనిచేసిన రాజకీయ అనుభవం, యువతతో ఉన్న అనుబంధం నేపథ్యంలో నల్లగొండ–ఖమ్మం–వరంగల్ పట్టభద్రుల ఎమ్మెల్సీ స్థానానికి శంకరాచారి అభ్యర్థిత్వంపై రాజకీయ వర్గాల్లో ఆసక్తి నెలకొంది. బీజేపీ అధిష్ఠానం ఎలాంటి నిర్ణయం తీసుకుంటుందో వేచి చూడాల్సి ఉంది.